LEKEITIOKO SANTO TOMAS AZOKA 2019

Lekeitioko Udalaren eta Lea-Artibai Landa Garapenerako alkartearen eskutik Santo Tomas Azoka ospatuko da, abenduaren 21ean. Urtero bezala, ohiko azokaz gain, eskualdeko etxe-abereen erakusketa egongo da ikusgai.

Egitarauaren helburu nagusia Lea-Artibai eskualdeko lehen arloko nekazaritzako eta abeltzaintzako ekoizleen lana sustatzea eta, aldi berean, haien produktuen kontsumoa bultzatzea da.

Azokan ikusi eta erosi daitezkeen produktu nagusiei dagokienez ondoko hauek aipa daitezke: hestebeteak, ortuariak, fruta, eztia, ardi, ahuntz zein behien gaztak, ahatekiak, baserriko ogia eta euskal pastela, okela, kontserbak, eta baita loreak ere.

Produktu freskoak eta sortu berriak izango dira, kasu askotan artisautzako prozesuen bidez ekoizten direnak, eta saltzailea zuzenean ekoizten duen pertsona bera izango da.